Taariikhda goolhaye Cabdi Wali Gaatamow

Cabdi Wali Colaad Qanyare oo ku caan baxay magaca Gaatamow waxa uu ku dhashay magaalada Beledweyn ee gobalka Hiiraan sanaddii 1980-kii. Waxa uu ku barbaaray magaalada Muqdsiho gaar ahaan degmada Dharkeynley xaafadda Macmacaanka. Waxa uu halkaasi kaga aflaxay dugsiga Qur’aanka, sidoo kale Gaatamow ayaa waxbarashada maadiga ku qaatay iskuulka Cali Xuseyn isaga oo halkaasi ku dhameystay seddexda heer ee iskuulka sannadkii 1999-kii.

Kaddibwaxa uu ku biiray jaamacadda Indian Ocean ee magaalada Muqdisho isaga oo ka qaatay diblooma maadada maareynta ganacsiga, waxa sidoo kale uu diblooma English ah ka helay jaamacadda Plasma, waxa uu hadda wax ka bartaa jaamacadda Jobkey oo uu ka dhigto Public Administration.

Sanaddii 1999-kii ayuu kusoo biiray ciyaaraha heerka koowaad isaga oo kamid noqday naadiga Webi Shabelle oo ka dhisneyd degmada Afgooye kana ciyaareysay horyaalka heerka koowaad ee dalka, waxaana uu kulankiisii ugu horreeyay la ciyaaray Feynuus oo wakhtigaa la oran jiray Alba.

Sanaddii 2000 ayuu ku biiray kooxda bariga dhexe waxaana uu kamid ahaa illaa 2002-dii, kooxdan ayuu ka saaciday in uu kasoo dalacsiiyo heerka labaad una gudbiyo heerka koowaad, intii uu joogay waxa uu la hantiyay hal koob oo ah heerka labaad.

Sannadkii 2002-dii waxa uu ku biiray kooxda Horseed isaga oo kamid ahaa illaa 2004-tii balse intii uu naadiga joogay ma uusan kula guuleysan wax koob ah, kaddib waxa uu caga dhigtay kooxda uu magaca ku sameeyay ee Banaadir Sports Club oo hadda loo yaqaan Muqdsiho City Club sannadkii 2004-tii isaga oo kamid ahaa illaa iyo 2015-kii.

Waxa uu ku sameeyay taariikh aan daahsoomi Karin, waxa uu kooxda kula guuleystay laba horyaal oo uu middi yahay mid aan xilli ciyaareedka oo idil aan laga adkaan iyo Jeneraal Daa’uud. Intii uu kooxda joogay waxa uu ka qeyb  galay safaro ciyaareed oo dibadda ah.

Sanaddii 2003-dii ayaa Gaatoow loogu yeeray matalidda  xulka qaranka Soomaaliya inkasta oo uusan kamid noqon qorshaha xulka maadama uu dhaawac soo gaaray. Mar kale ayaa loogu yeeray xulka 2005-tii ciyaartoyda ay da’dooda ka hooseyso 20 jirrada, waxa uu kulamo ciyaareed ugu qeyb galay tartanka Bariga iyo Bartamaha Afrika oo lagu qabtay dalka Zanzibar.

Sannadkii 2006-dii ayuu kamid noqday ciyaartoyda waaweyn ee xulka isaga oo kulankiisii ugu horreeyay la ciyaaray dalka Suudan tartan lagu qabtay Itoobiya kaasi oo katirsan Bariga iyo Bartamaha Afrika. Isla sannadkaasi waxa uu sidoo kale ka qeyb galay tartanka jaamacadda Carabta oo ka dhacay dalka Lubnaan.

Wixii ka danbeeyay 2006-dii goolhaye Gaatamow ayaan nasiib u yeelan matalidda xulka qaranka Soomaaliya inkastoo dhowr jeer loogu yeeray xulka in mar kale uu matalo.

Sanaddii 2015-kii ayuu go’aansaday in uu gabi ahaanba soo gabagabeeyo xirafadda ciyaaryahannimo isaga oo wixii intaasi ka danbeeyay isu beddelay caawiye tababare.

Hadda waa tababare ku-xigeenka kooxda Muqdisho City Club, waxa sidoo kale yahay macallinka goolhayayaasha xulka qaranka Soomaaliya.

W/Q: Maxamed Xasan Maxamed

Farriin danabeed: Mohassan484@gmail.com