Ahmiyad intee la eg ayay u leeyihiin dalka dib u dhiska taallooyinka?

Taallo waa goob lagu xuso laguna maamuuso shaqsiyaadka loo aqoonsaday in ay yihiin halyeeyo bulsho, sidoo kale waxaa laga dhigi karaa goobo xusuuso gaar ah leh sida kuwa ay ka dhaceen musiibooyin.

Taallooyinka waxay si weyn ugu qeyb qaataan quruxda iyo billicda deegaanka ay suran yihiin, halka ay ku taallana waa goob ka ilbaxnimo badan magaalooyinka kale aan laheyn dhismo taallo.

Waxaa intaa  dheer oo ay kaga geddisan tahay, waxaa ku badan oo aad u jecel dadka dalxiisayaasha ee ka imaanaya dibadda oo xiiseeya booqashooyinka goobaha ay ku yaalaan, sababtuna waa in ay tahay goob taariikheed.

Qaran burburkii ku yimid dalka sannadkii 1991-kii waxaa meesha ka baxay in badan oo ah goobaha taariikhiga sida taallooyinkii dalka uu caanka ku ahaa oo ay kuwa ugu badan ku yiileen caasimadda Muqdisho.

Inta badan taallooyinka magaalada caanka ku ahayd sida Xaawo Taako, Daljirka Daahsoon, Sayid Maxamed  Cabdulle  Xasan, SYL, Axmed Gureey iyo Dhagaxtuur oo ahaa kuwii ugu badnaa ee uu ku yimid burburka ayaa hadda qaar kamid ah u muuqda in lagu sameeyay dayactir qurxoon inkastoo aan loo dhammeystirin aqoonsiyadii ay caanka ku ahaayeen.

Waxay markoodii hore ahaayeen goobo caan ah oo loo dalxiis tago, dadkii noolaa berigii hore markii ay arkaan dhismayaasha iyo waxa ay ka tarjumayaan, isla markiiba qof waliba ayaa suuradeysan jirey in sawirrada kor suran dhismayaasha uusan dheel ku imaan balse uu ahaa mid dhiig ku daatay.

Dib u dhiska xusuusahaan, ahmiyahadaha ay leeyihiin waxaa kamid ah in dhallinyarada Soomaaliyeed ee lasoo jaan qaaday burburka ay ka baran karaan wax badan, maadaama maqal keliya ay ku heystaan magacyada halyeeyadaan kuwaasi oo naftooda u huray sidii Soomaalida danbe ugu noolaan lahaayeen xurnimo loo dhan yahay.

Ahmiyadaha waxaa intaasi dheer in ay noqon karaan goobo loo dalxiis tego, kana qeyb qaadan kara billicda iyo quruxda magaalada Muqdisho, xitaa ay suura gal noqon karto in dakhli laga sameeyo si loogu damaashaad tago.

W/Q: Maxamed Xasan Maxamed

Farriin danabeed: Mohassan484@gmail.com