Maxaan ka dhaxleynaa marka hareeraha waddooyinkenna lagu beero geed miroodka?

Dunida maanta waxaa lagu tartamayaa in la beero geedaha iyada oo looga gol leeyahay in laga hortago xaalufinta degaanka iyo isbeddel ku imaanaya cimillada isla markaana la helo degaan cagaaran si ay manaafic ugu helaan dadka iyo duunyada.

Ahmiyadda ay leedahay geed beerista waxa lagu sheegay Quraanka taasi oo ku tusineysa muhiimaddiisa, sida nabigeenna ka sugnaatay waxa uu yiri inaad geed beerto oo la cuno waa saddaqo, sidoo kale haddii la xado waa ajar, haddii lasoo booqdanna waa saddaqo aan idlaan oo uu Eebbe kugu abaal marinayo, sidoo kale riwaayad uu weriyey Muslim ayaa sheegeysa qofka muslimka ah haddii uu geed beero isla markaanna bini aadamka, xayawaannada lararto isal markaanna ay shimbiraha cunnaan waa saddaqo taasi oo kuu soconeysa ilaa maalinta qiyaamaha.

Dhammaadka bishii July 2019 dowladda Itoobiya ayaa dunida ka sameysay rikoor lama ilaabaan ah kaddib markii ay hal maalin ku beertay 350 milyan oo geed, taasi oo ay ku doonayaan in degaankooda ay ka dhigaan goob cagaaran.

Ra'iisul wasaare Abiy Ahmed oo geed beeraya isaga iyo shacabkiisa.

Taariikhaha la xiriirta dhir beerista intaasi kuma eka oo waxaa jira rikooro badan oo ku dhigan buugga diiwaanka caalamka, bal haddii mid kamid ah aynu halkaan kusoo bandhigno dhiganayaalkaasi, Ken Chaplin oo u dhashay dalka Canada ayaa sannadkii 2001 ayaa hal maalin ku beeray 15,170 oo geed.

Billowga geed biirista.

Sameynta wanaagsan waa mid kamid ah waxyaabaha kuu sahlaya gelidda Jannada oo ah halka uu qof waliba oo muslim ah ku riyoodo, meelaha ku habboon in aad ku muujiso wanaagga waxaa kamid ah daryeelidda duur joogta iyo dab joogga adiga oo halka ugu sahlan ka dhigi kara in aad geed u beerto.

Tusaale dalka Holland oo kamid ah dalalka ku yaalla qaaradda Yurub waxay bilaabeen in saqafka sarre ee goobaha dadka ku sugaan gaadiidka dadweynaha ay ku beeraan ubaxa  taasi oo faa’ido u ah shinnida iyo noolaha kale.

Goobta dadweynaha ku sugaan gawaarida oo saqafka sarre dhir ku beeran tahay.

Bal qiyaas haddii Holland ay u daneynayaan duunyada inagunna maxaa inoo diidaya in aan ku dayanno isla markaana hareeraha waddooyinkeenna aynu ku beerno dhir? Haddii ay suura gal noqoto fikraddaan, faa’idada ka dhalan karta waxay tahay in darbi jiifteenna ay u tahay meel ay kaga maarmi karaan in dadka wax weydiistaan isla markaanna ay yareyso baahi badan oo ay dareemi lahaayeen sidoo kalena goobaha ay dhirta ku beeran tahay waxaa kasoo baxaya muuq qurxoon, beeraha dhirtaasina uu Ilaah abaal gud u siinayo ajar fara badan.

W/Q: Maxamed Xasan Maxamed

Farriin danabeed: Mohassan484@gmail.com